>
ថ្ងៃទី 15 មេសា 2011
CEN
កំពត: ក្តីរំពឹងទុករបស់អ្នកសហមន៍ទេសចរណ៍អន្លង់ធំស្ថិតក្នុងឃុំព្រែក ត្នោត ស្រុកទឹកឈូ ថានឹងមានភ្ញៀវពីគ្រប់ទិសទី មកកម្សាន្តច្រើនក្នុងឱកាសបុណ្យចូលឆ្នាំថ្មីប្រពៃណីជាតិខ្មែរនៅ ឆ្នាំនេះត្រូវរលាយទៅវិញ ដោយសារទឹកជ្រោះដែលធ្លាប់ហូរចុះពី ជើងភ្នំបូកគោនោះមិនមានគ្រប់គ្រាន់សម្រាប់ហែលលេងដូចកាលពីរដូវ បុណ្យភ្ជុំបិណ្ឌនាពេលកន្លងទៅ ។ ព្រោះតែជួបបញ្ហាបែប នោះហើយទើបរយៈពីរថ្ងៃនេះភ្ញៀវជិតឆ្ងាយធ្វើដំណើរមកដល់សហគមន៍ ទេសចរណ៍អន្លង់ធំមានតិចតួចបំផុត ធ្វើឱ្យអ្នកលក់ដូរម្ហូបអាហារត្អូញត្អែរគ្រប់ៗគ្នាពីរឿងរកចំណូល មិនបាន សូម្បីខ្ចូសដែលរៀបចំកាន់តែល្អស្អាតជាងមុនរហូតដល់ជិត២០ខ្នង នៅប្របដងជ្រោះ និង ក្នុងព្រៃព្រឹក្សាក៏ស្ថិតក្នុងភាពស្ងប់ស្ងាត់កណ្តោចកណ្តែងដែរ ។
ជាមួយនឹងទិដ្ឋភាពបែបនេះលោកឆោម ឆុំ អ្នកទទួលខុសត្រូវនៅសហគមន៍ទេសចរណ៍អន្លង់ធំបានរៀបរាប់ថារយៈពេល ពីរថ្ងៃនេះ (១៣-១៤ មេសា) ភ្ញៀវមកលេងនៅអន្លងធំមានតិចតួចបំផុតបើប្រៀបធៀបជាមួយឱកាសបុណ្យ ភុំបិណ្ឌ ដោយសរុបទៅមានម៉ូតូប្រហែលជាង ១០០គ្រឿង និង រថយន្តប្រមាណប្រហែល ២០ទៅ៣០គ្រឿងប៉ុណ្ណោះ។ បញ្ហាបណ្តាលមកពីភ្ញៀវមកដល់ហើយមិនមានទឹកសម្រាប់ហែលលេងកម្សាន្ត ទើបព័ត៌មាននេះអាចជ្រាបពីមួយទៅមួយតាមរយៈការជូនដំណឹងឱ្យគ្នា។ លោកត្អូញត្អែរថា បើនៅតែគ្មានភ្លៀងបន្តទៀតនោះមិនសង្ឃឹមថា អំឡុងបុណ្យចូលឆ្នាំថ្មីនេះសហគមន៍អន្លង់ធំអាចទាក់ទាញភ្ញៀវ បានច្រើនដូចការរំពឹងទុកឡើយ ព្រោះធម្មតាអ្នកមកភាគច្រើនតែងមានបំណងលេងកម្សាន្តជាមួយការហែល ទឹកជ្រោះថ្លា ត្រជាក់កាយធូរអារម្មណ៍ ។ ទាក់ទិននឹងអ្នកលក់ម្ហូបអាហារវិញលោកឆោម ឆុំ បន្តថា គម្រោងនៃការត្រៀមចាំលក់ជូនភ្ញៀវដែលមាន រហូតដល់ជាង ២០តូបនោះ ឥឡូវថយច្រើន ព្រោះតែមើលទៅសភាពភ្ញៀវមានសន្ទុះថយចុះជាក់ស្តែងបែបនោះ ។
ទោះជាបែបនេះក្តីអ្នកទួលខុសត្រូវសហគមន៍បានអំពាវនាវដល់ភ្ញៀវជិត ឆ្ងាយ សូមមានការចាប់អារម្មណ៍នាំគ្នាមកលេង នៅ សហគមន៍ទេសចរណ៍របស់លោកឱ្យបានច្រើន ត្បិតនៅទីនេះបច្ចុប្បន្នបាបរៀបចំខ្ចូសល្អស្អាតសម្រាប់អង្គុយ ទទួលទានក៏ដូចជា គយគន់មើលព្រៃព្រឹក្សាប្រកបដោយទេសភាពប្រណីតៗ រក្សាបានតាមបែបធម្មជាតិ មានការគិតគូរលើបញ្ហអនាម័យ ដែលមានដាក់ពង្រាយធុងសំរាម និង ធ្វើអនាម័យជាប្រចាំ ព្រមទាំងមានបង្គន់គ្រប់គ្រាន់ ។ ចំណែកតម្លៃម្ហូបអាហារវិញសហគមន៍មានការ គិតគូរមិនបណ្តោយឱ្យមានការឆ្លៀតឱកាសលក់តម្លើងថ្លៃទេ ហើយបើសិនបញ្ហាមិនប្រក្រតីណាមួយកើតឡើងអាចរាយការណ៍ជូន អ្នកទទួលខុសត្រូវដើម្បីចាត់វិធានការ ជឿសវាងប៉ះពាល់ដល់អារម្មណ៍ភ្ញៀវទាំងឡាយ ។ ពិសេសបញ្ហាសុវត្ថិភាពត្រូវបានធានា រួមទាំងទ្រព្យសម្បត្តិដូចជា យានយន្តជាដើមមិនឱ្យមានការបាត់បង់ ឬ ខូចខាតព្រោះតែការចតទុកក្នុងបរិវេណរបស់សហគមន៍នេះ ដោយសារការថែមើលមិនដិតដល់នោះឡើយ ៕